’12 orë në det të hapur’, ankorohet me vështirësi trageti me 118 pasagjerë në Vlorë

Moti i keq dhe me erë të fortë ka bërë të pamundur ankorimin e tragetit Brindisi-Vlorë mëngjesin e sotëm. 118 pasagjerë për rreth 12 orë kanë mbetur të bllokuar në traget në det të hapur. Trageti ka mbërritur në orën 6 të mëngjesit dhe është ankoruar ne orën 18.00 pasdite.

Pasagjerët, të lodhur shprehen se kanë qëndruar 17 orë që prej mbrëmjes së djeshme ndërsa nuk janë lajmëruar.

“E vështirë, e lodhshme, por shyqyr që ishim mirë”, u shpreh një pasgjer.

Ishte shumë e lodhshme, e mundimshme e turpshme mbi të gjitha. E turpshme që funksionon kështu”, tha një tjetër.

Disa prej tyre shprehen se kanë ndenjur pa ngrënë për shkak të çmimeve të shtrenjta.

“4 euro një panine”, tha një pasagjere.

Kjo nuk është hera e parë që pasagjerët mbesin të bllokuar në traget për shkak të motit të keq në Portin e Vlorës.

Më 30 nëntor, 129 pasagjerë në bordin e tragetit që vinte nga Brindisi mundën të zbrisnin në tokë pas 6 orësh qëndrim në mes të detit të trazuar.

Ndërkohë për shkak të motit të keq është pezulluar edhe lundrimi për anijet e vogla dhe ato të peshkimit në Vlorë.