Lefter Koka rrezikon deri në 10 vite burg, thotë gazetari

Gazetari i Euronews Albania Eni Ferhati tha në “Now” se Lefter Koka rrezikon deri në 10 vite burg referuar parashikimeve të Kodit Penal.

Hetimi në një dosje të veçantë për inceneratorin e Elbasanit, sipas tij është i cunguar.

Ai tha se SPAK ka lënë jashtë inceneratorin e Tiranës dhe Fierit, ndërkohë që bëhet fjalë për të njëjtët njerëz dhe të njëjtat kompani.

“Unë e shikoj të nxituar, për hir të së vërtetës për shkak se e gjithë kjo skemë fiktive mashtrimi, me vlera kaq të mëdha ku ish-ministri Lefter Koka dyshohet që ka përfituar në mënyrë të padrejtë rreth 3.7 milionë euro, nuk mund të mbyllet vetëm me tre persona,” – tha Ferhati.

Ndërsa shpjegoi skemën e mashtrimit, gazetari i Euronews Albania tha se nuk është e qartë ku ndodhen paratë, duke qenë se nuk ka pasur as bllokim të llogarive bankare.

“Ka dyshime se paratë janë transferuar disa herë në llogari të ndryshme, ndoshta dhe në parajsa fiskale për t’iu shmangur ndjekjes së autoriteteve,” – u shpreh Ferhati.

Ditën e sotme me urdhër të SPAK u arrestua ish-ministri i Mjedisit Lefter Koka i cili akuzohet për shpërdorim detyre, korrupsion dhe pastrim parash. Sipas hetimeve, ish-zyrtari ka favorizuar një kompani për marrjen e koncensionit për inceneratorin e Elbasanit.

LEXONI GJITHASHTU:

• Arrestohet ish-ministri Lefter Koka
• Kush është Lefter Koka, lëvizjet nga PS te LSI të ish-kryebashkiakut të Durrësit
• Si e shpërdoroi detyrën dhe si u korruptua Lefter Koka?