‘Të kanë quajtur komunist’, Gjata-Hasës: Thuaja Bashës kur të ngrihet nga gjumi

Në “Mirëmëngjes” në Euronews Albania u përmend se ka gjasa që përçarja në Partinë Demokratike të përshkallëzohet pas Kuvendit Kombëtar në datën 18 dhjetor.

Sipas sekretarit për Organizimin Digjital në PD, Endri Hasa diçka e tillë nuk mund të ndodhë aq më pak nga grupi për rithemelimin e PD, të cilin ai e cilësoi si “grupi për rikonstruktimin e Partisë Komuniste”.

Hasa solli në vëmendje se kur shumë persona e akuzonin Bashën se kishte afruar në radhët e partisë individë me prejardhje komuniste, si Çlirim Gjata, ai kishte qenë aty për ta mbrojtur, ndryshe nga çfarë po ndodh me Foltoren, që sipas tij është kthyer në një “fletë-rrufë” për anëtarët e PD-së.

Anëtari i Këshillit Kombëtar Çlirim Gjata vendosi të ndërhynte në një lidhje telefonike, pas një debati të mëparshëm me Hasën për të sqaruar pozicionin e tij.

“Është mirë që t’i thonë zotit Basha kur ta takojnë në PD që këto gjëra kam thënë për Çlirim Gjatën, se nuk besoj se Basha është zgjuar të dëgjojë çfarë thotë, pastaj bisedojmë bashkë. Këto janë të turpshme,” – u shpreh Gjata.

Endri Hasa kundërshtoi reagimin e Gjatës, duke sqaruar se ai e ka mbrojtur.

“Me meritë apo pa meritë nuk e di, se me mënyrën si flet mbase kam bërë gabim,” – shtoi ai.

Sipas Hasës, PD është parti e njerëzve të lirë, që prodhon liderë të të gjitha niveleve dhe në 18 dhjetor pritet ndryshimi rrënjësor që do të mundësojë hapjen e partisë, duke lënë pas “mbajtjen peng” të saj.

Pavarësisht përçarjes së dukshme, Hasa siguroi se Partia Demokratike është funksionale dhe po punon çdo ditë në interes të shqiptarëve.

LEXONI GJITHASHTU:

• “Të dorëhiqet Basha”, anëtarët e PD-së: Të mblidhet Këshilli Kombëtar, analizë për humbjen
• Këshilli Kombëtar i PD anulon vendimet e Kuvendit ‘Berisha’
• Këshilli Kombëtar shkarkon nga funksionet Palokën, Nokën, Bumçin, Vokshin, Bylykbashin, Strazimirin dhe sekretarët