Albana Vokshi pas vendimit të kryesisë së PD: S’më përjashtojnë dot ata që nuk kanë lidhje me partinë

Deputetja e Partisë Demokratike Albana Vokshi ka reaguar përmes një postimi në rrjetet sociale pas vendimi të Kryesisë së Partisë Demokratike për përjashtimin e saj nga partia, bashkë me 6 anëtarët e tjerë të komisionit të rithemelimit.

Vokshi shprehet se nuk mund ta përjashtojnë nga ‘PD një grup uzurpatorësh që PD-në e kanë mjet për pasurimin personal, ndaj e duan me çdo kusht’. Sipas saj, i vetmi organ legjitim në Partinë Demokratike, mandatuar nga Kuvendi Kombëtar i 11 dhjetor 2022, është komisioni i rithemelimit të PD.

“Ata nuk kanë lidhje as me demokratët as me demokracinë. I vetmi organ legjitim në Partinë Demokratike, mandatuar nga Kuvendi Kombëtar i 11 dhjetor 2022, është Komisioni i Rithemelimit të PD në të cilin unë jam anëtare. Lulzim Basha është shkarkuar me 4446 vota të delegatëve legjitim të Kuvendit Kombëtar të PD, vendim ky i ratifikuar në mënyrë unanime nga rreth 44 mijë anëtarë të PD në referendumin e dt 18 dhjetor 2022. Në demokraci sovrani vendos!” shkruan Vokshi në Facebook.

Në mbledhjen e kryesisë së PD që zgjati deri në orët e para të mëngjesit, është vendosur përjashtimi i përhershëm i Sali Berishës nga kjo parti si edhe përjashtimi për 7 anëtarët të Komisionit të Rithemelimit: Bujar Nishani, Flamur Noka, Albana Vokshi, Edmond Spaho, Arben Ristani, Klevis Balliu dhe Keltis Kruja.

LEXONI GJITHASHTU:

• Kryesia e PD-së përjashton përgjithmonë Sali Berishën nga partia