Mjeku Alimehmeti: 26% e testeve rezultojnë pozitivë, fokusi tek vaksinimi

Mjeku Ilir Alimehmeti deklaroi për emisionin “Mirëmëngjes” në Euronews Albania se javët e fundit ka pasur një rritje të infektimeve me variantin Omicron, por fatmirësisht nuk ka pasur një rritje të shtrimeve në spitale.

“Shifrat në rritje ishin të pritshme në fakt. Kemi pasur hyrje më të madhe të variantit Omicron që para festave. Jemi me një përqindje pozitiviteti të testit gati 25-26%. Numri spitalor mbetet i qëndrueshëm.  As masat e marra nuk të mbrojnë nga ky variant, Omicron. Ka një transmetueshmëri shumë të lartë”, u shpreh mjeku.

Z. Alimehmeti shtoi se e vetmja gjë e rëndësishme në këtë pikë të pandemisë është vaksinimi i njerëzve.

“Ky do jetë varianti i fundit shqetësues. Fatkeqësisht kjo do prekë këdo, edhe ata që deri më sot nuk janë infektuar. Por do u ofrojë imunitetin natyror, kemi edhe riskun e shtrimeve në spital”, u shpreh mjeku për variantin Omicron.

Ndërsa mjeku nga Kosova, Ilir Tola u shpreh se në këtë shtet situata epidemiologjike është e qëndrueshme.

“Situata është pak me e qetë sesa në Shqipëri. Situata epidemiologjike është stabile. Numri i të hospitalizuarve është i vogël. Kemi edhe shumë persona që po marrin dozën e tretë. Jemi shumë mirë në krahasim me vendet e rajonit sa i përket vaksinimit me dy doza”, tha ai.