Bindja Demokratike thirrje qytetarëve të votojnë opozitën më 6 mars

Partia Bindja Demokratike u bëri thirrje qytetarëve që të votojnë kandidatët e opozitës në zgjedhjet e pjesshme vendore të 6 marsit.

Partia e drejtuar nga Astrit Patozi do të qëndrojë asnjanëse në raport me kandidatët e opozitës. Për të rëndësi ka që të votohet një kandidat opozitar, pavarësisht cilës parti i përket.

Megjithatë, mospasja e një kandidati të përbashkët përballë qeverisë e dëmton opozitën, sipas Bindjes Demokratike.

Bindja Demokratike nuk përmendi nëse do të bëjë koalicion me ndonjë parti, apo nëse do të kandidojë e vetme.

Por në deklaratë thuhet se “Në kushtet e krijuara çdo kandidaturë e re nga radhët e opozitës vetëm se do ta rëndonte edhe më tepër pozitën e saj në raport me maxhorancën dhe do të zbehte edhe më shumë shanset për fitore”.

Zgjedhjet e pjesshme vendore do të mbahen më 6 mars, në 6 bashki të vendit.

Partia Demokratike është “e ndarë në dysh në këto zgjedhje”, pasi PD e Berishës do të paraqesë 6 kandidatë të ndryshëm nga ata të PD-së zyrtare.

Sali Berisha deklaroi sot se 6 kandidatët e Komisionit të Rithemelimit do të kandidojnë në koalicion me LSI-në.