Aksident në autostradën Durrës-Tiranë, plagoset polici në shërbim, 2 në pranga

Mesditën e sotme është shënuar një aksident i rëndë në autostradën Durrës-Tiranë. Policia e Shtetit bën me dije se një automjet i drejtuar nga një 20-vjeçar ka dalë nga rruga dhe për pasojë ka përplasur një punonjës policie, i cili po kontrollonte anash rrugës një mjet tjetër për shkelje të rregullave të qarkullimit. 

“Më datë 04.05.2020, rreth orës 13:00, në rrugën interurbane kryesore Durrës-Tiranë, në hyrje të Vorës, automjeti i drejtuar nga shtetasi me iniciale M. B ., 20 vjeç, ka humbur kontrollin si rezultat i shpejtësisë dhe për pasojë ka goditur automjetin e ndaluar jashtë rruge tip BMW X5, si dhe punonjësin e Policisë Rrugore me iniciale R. Q., i cili në momentin e përplasjes po kryente verifikimet dhe veprimet policore ndaj drejtuesit të automjetit tip BMË X5 në krahun e shoferit të këtij mjeti, i cili ishte konstatuar duke qarkulluar pa vendosur targat në vendin e caktuar”, njofton policia.

Punonjësi i policisë është dërguar menjëherë për trajtim në spital, ndërsa dy shoferët janë shoqëruar në komisariatin e Vorës dhe po merren në pyetje në lidhje me këtë ngjarje.

“Të dy drejtuesit e mjeteve të përfshirë në aksident janë shoqëruar në ambientet e Komisariatit të Policisë Vorë, për veprime të tjera hetimore”, thuhet më tej në njoftim.