Karantina shton dhunën ndaj grave, Iris Luarasi: Shifrat janë dyfishuar në krahasim me vitin e kaluar

Dhuna është një fenomen që vazhdon prej vitesh në vendin tonë. Por kjo përiudhë karantine i ka shtuar edhe më shumë rastet. Në pamundësi për të dalë, shumë grave u është dashur të jetojnë me dhunuesin, e të mos tregojnë për dhunën që ushtrohet ndaj tyre, e gjitha kjo nga frika se nuk janë të zonja t’ia dalin në jetë.

Për  këtë fenomen shqetësues në “Ilva Now” ishte e ftuar pedagogia dhe përfaqësuesja e Qendrës Linja e Këshillimit për Gra dhe Vajza, Iris Luarasi. Ajo tha se izolimi ka dyfishuar dhunën në familjen shqiptare, ndërsa theksoi se kjo faktohet nga numri i telefonatave të regjistruara tek kjo qendër.

“Në fakt, studimet e mëparshme të krizave dhe emergjencave natyrore, që kanë ndodhur në botë më përpara kanë treguar se gjithmonë rritet dhuna, por veçanërisht statistikat që kemi pasur e kanë vërtetuar më së miri këtë pjesë, sepse na është rritur numri i telefonatave. Kemi bërë krahasimet mes numrit e telefonatave që kemi marrë një vit më parë, gjatë marsit dhe prillit. Është dyfishuar numri. Në prill të këtij viti kemi marrë dyfish telefonata që kemi marrë në prillin e 2019”, tha ajo.

Pedagogia tha se një favor në këtë situatë ka qenë edhe funksionimi i gjykatave, të cilat kanë dhënë urdhra mbrojtjeje për gratë e dhunuara, pavarësisht situatës së krijuar nga COVID-19.  Znj. Luarasi u shpreh se telefonatat më të shumta kanë ardhur nga qyteti i Tiranës. Më tej ajo shpjegoi edhe asistencën që jep organizata e saj për gratë e dhunuara.

 “Gjykata në fakt nuk është mbyllur, përjashto një javë, për dhënien e urdhrit të mbrojtjes. Stafi mundohet të bëjë një identifikim të nevojave nëse gruaja ka arsye për t’u larguar nga banesa. Kemi bashkëpunuar me policinë, por edhe me mekanizmat e tjerë të pushtetit vendor, veçanërisht me bashkinë Tiranë, sepse telefonatat më të shumta kanë qenë në Tiranë”, shtoi ajo.

Mes tjerash, pedagogia theksoi se ajo që vihet re është ulja e rasteve të denoncimeve të dhunës në organet e Policisë së Shtetit. Kjo qasje sipas saj lidhet me frikën që kanë gratë për ta përballuar vetë jetesën e tyre. Ajo apeloi që gratë, të cilat bien pre e dhunës të telefonojnë në numrat pa pagesë 116 dhe 117.