Piktura e grabitur nga nazistët i kthehet pas 71 vjetësh familjes hebreje

Muzeu kryesor i artit në Belgjikë i ka kthyer një pikturë që mbante prej 71 vjetësh stërnipërve të një çifti hebrenjsh, prona e të cilëve u plaçkit nga nazistët pasi ata u arratisën gjatë Luftës së Dytë Botërore.

Firma ligjore e familjes hebreje kontaktoi Muzeun Mbretëror të Arteve të Bukura 5 vjet më parë dhe këtë të enjte, pas një ceremonie të shkurtër, punëtorët e hoqën pikturën nga muri dhe e paketuan për t’ia kthyer pronarëve.

“Familjes Mayer i mungojnë në total 30 piktura, përfshirë një të Max Liebermann. Problemi me identifikimin e këtyre pikturave është se fatkeqësisht ne nuk kemi foto të tyre. Megjithatë kemi përshkrime dhe kështu u bë i mundur identifikimi i njërës prej tyre”, thotë Imke Gielen, avokat i pronarëve të pikturës.

Asnjë prej 9 stërnipërve të çiftit Mayer ishte i pranishëm në ceremoninë e së enjtes. Piktura, me disa lule ngjyrë rozë në një vazo blu, e realizuar nga artisti gjerman Lovis Corinth, i përkiste Gustav dhe Emma Mayer, të cilët braktisën shtëpinë e tyre në Frankfurt në vitin 1938, për t’u strehuar në Bruksel derisa u transferuan në Britani një vit më vonë.

Fatkeqësisht, ata nuk mundën të merrnin me vete pasuritë e tyre, përfshirë 30 pikturat që u grabitën nga nazistët. Mes tyre ishte edhe vepra ekspresioniste “Lulet”, e pikturuar në vitin 1913 nga Corinth, veprat e të cilit nazistët i konsideronin si “të degjeneruara”.

Pas luftës, autoritetet belge nuk arritën të gjenin pronarin e saj dhe ia besuan pikturën muzeut në vitin 1951, ku ka qëndruar deri më sot.

LEXONI GJITHASHTU:

• Bota e artistit të rrugës, 130 pikturat e Banksy shfaqen në ekspozitë në metron e Milanos
• Piktura e artistit Leonardo Da Vinçi në ankand për 16.7 milionë dollarë