Kina nis evakuimet nga Ukraina

Media shtetërore kineze lajmëroi se ka nisur evakuimin e qytetarëve të saj nga Ukraina.

Rreth 400 studentë me bazë në qytetin port të Detit të Zi të Odessa, dhe 200 të tjerë nga kryeqyteti, Kiev, u larguan nga vendi të hënën, sipas tabloidit shtetëror Global Times, i cili citon Ambasadën Kineze në Ukrainë. 1 mijë qytetarë të tjerë pritet të evakuohen në vendet fqinje të martën.

Planet për fluturime çarter për të nxjerrë qytetarët kinezë u ndaluan gjatë fundjavës pasi luftimet u intensifikuan. Ambasada kineze në Ukrainë mori në konsideratë rreziqet e sigurisë.

Ndryshe nga qytetarët e shumë vendeve të tjera, shtetasit kinezë në Ukrainë nuk morën udhëzime për t’u larguar nga vendi përpara se të fillonte pushtimi rus. Përpara sulmit të Rusisë, zyrtarët kinezë kundërshtuan paralajmërimet nga Shtetet e Bashkuara dhe aleatët e saj.

Zëdhënësi i Ministrisë së Jashtme të Kinës, Wang Wenbin, mbrojti të hënën qasjen e Pekinit, duke thënë se ministria dhe Ambasada Kineze në Ukrainë paralajmëruan në kohën e duhur.

Sipas mediave shtetërore, në Ukrainë janë rreth 6 mijë shtetas kinezë.

LEXONI GJITHASHTU:

• Dita 6, si po shkon lufta në zona të ndryshme të Ukrainës