‘Airbnb’ hap dyert për Ukrainën, akomodon 100 mijë persona falas

Kompania që jep shtëpi me qira ditore, “Airbnb”, njoftoi se dega e saj jofitimprurëse “Airbnb.org” do të ofrojë strehim të përkohshëm falas për rreth 100 mijë refugjatë që largohen nga Ukraina.

Shefi ekzekutiv, Brian Chesky dhe drejtori i “Airbnb.org”, Joe Gebbia u kanë dërguar letra liderëve të Polonisë, Rumanisë, Gjermanisë dhe Hungarisë, duke ofruar ndihmë për strehimin e refugjatëve.

“Ne kemi shënuar një rekord për garantimin e strehimit të dhjetëra mijëra njerëzve në botë. Në historinë tonë kemi strehuar rreth 100 mijë njerëz në nevojë falas dhe do të ndihmojmë edhe këtë herë. E vetmja nevojë që kemi është të përhapet fjala”, Chesky.

Rreth 300 mijë refugjatë ukrainas kanë hyrë në territorin e Bashkimit Evropian që kur Rusia nisi agresionin ndaj vendit dhe blloku, sipas autoriteteve, duhet të përgatitet për miliona të tjerë.

“Airbnb.org”, që ofron qëndrim të përkohshëm për njerëzit gjatë krizave, do të punojë ngushtë me qeveritë për të ndihmuar në adresimin e nevojave në çdo vend, përfshirë atë për strehim afatgjatë.

Qëndrimi do të financohet nga kompania mëmë “Airbnb”, filialet e saj dhe donatorët.

Kompani të tjera kanë ofruar gjithashtu mbështetje për bizneset dhe konsumatorët në Ukrainë, si për shembull ajo e shitjeve online “ETSY.O”.

Ndërkohë, “Verizon Communications” dhe britanikja “Virgin Media” kanë hequr tarifat për përdoruesit e tyre në Ukrainë.