Nuk ka vend për panik për sigurimin e miellit, thotë Tarelli

Drejtori i Përgjithshëm i Politikave të Bujqësisë, Sigurisë Ushqimore dhe Zhvillimit Rural, Irfan Tarelli tha për emisionin “Mirëmëngjes” në Euronews Albania se nuk ka aspak vend për panik te qytetarët për sigurimin e miellit apo bukës.

“Së pari rezervat e grurit dhe të miellit të importuara që më parë janë të mjaftueshme për të garantuar një furnizim të tregut dhe e dyta importet e këtyre produkteve vazhdojnë pa asnjë ndërprerje. Në këtë kuptim gjithë popullsia duhet të jetë e qetë dhe e garantuar që këto produkte nuk do të mungojnë në treg,” tha zoti Tarelli.

I pyetur nga gazetarja e Euronews Albania Ermelinda Ndoja se cilat janë masat e marra për shtimin e sigurisë për bizneset dhë qytetarët për sasi të mjaftueshme mielli në treg, Tarelli tha se janë përqendruar të studimi i tregut dhe marrja e informacioneve nga shtetet partnere.

“Me fillimin e tensioneve që u shfaqen midis Rusisë dhe Ukrainës ne patëm një vëmëndje të shtuar me strukturat tona së pari për të evidentuar në mënyrë urgjente gjendjen e produkteve në treg, ecurinë e importeve dhe sensibilizimin e subjekteve importues për të shtuar sasinë e importuar në treg”, tha ai.

“Masa e dytë kanë qënë kontaktet me shtetet partnere për të siguruar informacionin e nevojshëm dhe bashkëpunimin në masën që u takon strukturave shtetërore të influencojnë dhe informimin e operatorëve të tregut për mundësitë potenciale për të siguruar këtë lloj vazhdimësie”, u shpreh drejtori i Përgjithshëm i Politikave të Bujqësisë, Sigurisë Ushqimore dhe Zhvillimit Rural.

Intervistën e plotë me zotin Tarelli mund ta lexoni këtu