Tensionohet situata te Teatri Kombëtar, policia bashkiake kërkon të marrë në dorëzim godinën

Policia Bashkiake ka shkuar këtë të mërkurë  te teatri kombëtar për t’u kërkuar artistëve dhe aktivistëve që të lirojnë godinën pasi me vendimin e Këshillit të Ministrave, trualli i përket Bashkisë së Tiranës.

Sipas artistëve, disa efektivë janë përpjekur të hyjnë në ambientet e brendshme të teatrit për të ekzekutuar vendimin e marrë përpara disa ditësh nga qeveria por kanë hasur në rezistencë nga ana e aktivistëve që për më shumë se dy vite qëndrojnë aty.

Ky veprim është marrë si një shenjë provokimi nga ana e artistëve, pasi sipas tyre është bërë në një moment të vështirë kur qytetarët nuk mund të  reagojnë në mbrojtje të teatrit.

Përpara se të largoheshin efektivët e policisë kanë lënë një dokument në derën e Teatrit ku kërkohet marrja në dorëzim e godinës. Megjithatë artistët thonë se rezistenca do të vazhdojë deri sa të arrihet një zgjidhje e drejtë për fatin e teatrit,

Përplasja vjen disa ditë pasi Këshilli i Ministrave ka marrë vendimin që truallin e Teatrit Kombëtar ta kalojë në pronë të Bashkisë Tiranë. Në vendimin që është publikuar në Fletoren Zyrtare, bëhet me dije se i jepet mundësi bashkisë që të ndërtojë godinën e re me standarde e kushte bashkëkohore.