Shkarkimi i Metës, “Venecia” publikon raportin më 11 tetor

Me kërkesë të kreut të Kuvendit të Shqipërisë, Gramoz Ruçi, një delegacion nga Komisioni i Venecias udhëtoi drejt Tiranës, për çështjen e shkarkimit të Presidentit të Republikës.

Gjatë vizitës dy ditore, delegacioni përmbylli fazën e parë të misionit “faktembledhës”, duke marrë në konsideratë të gjithë informacionet e mbledhura nga takimet me krerët politikë në vend.

Në lidhje me anulimin e datës së zgjedhjeve nga Meta, do të ketë një fazë tjetër për të vërtetuar ligjshmërinë e vendimit të tij.

11 tetori pritet të jetë data kur do të publikohet raporti i Komisionit të Venecias, mendimi i të cilit luan një rol kyç.

Gjykata Kushtetuese do të japë verdiktin final edhe nëse Kuvendi do të arrijë të sigurojë 94 vota pro për shkarkimin e Metës, por pasi të bëhet funksional.

Në ditën e parë të vizitës, delegacioni i Komisionit të Venecias zhvilloi disa takime duke filluar nga kreu i Kuvendit, përfaqësues të opozitës jashtë parlamentare e asaj parlamentare dhe përfaqësues të qeverisë.

Agjendën e mbyllën me takimin me anëtarët e Komisionit Hetimor të ngritur në lidhje me shkarkimin e Metës.   

Pas përfundimit të marrjes në pyetje, presidenti Meta përmes një statusi tha se Institucioni i Presidentit do të jetë në mbrojtje të Kushtetutës me qëllim anëtarësimin e shpejtë të Shqipërisë në BE.