Spahia: SPAK të hetojë, përpara alarmit për zjarr zyrat e Ministrisë së Shëndetësisë u hapën forcërisht

Opozita akuzoi sërish të shtunën Ministrinë e Shëndetësinë se është përpjekur të zhdukë dokumente të tenderëve sekretë. Ajo i bëri thirrje Strukturës së Posaçme kundër Korrupsionit dhe krimit të Organizuar (SPAK) që të hetojë për të zbuluar të gjitha lidhjet e mundshme.

Ish-deputeti Bardh Spahia shkroi në Facebook se ka informacione se një ditë përpara rënies së zjarrit, të denoncuar dy javë më parë, zyrat e tenderëve janë hapur forcërisht.

“Mëngjesin e 15 prillit, punonjësit që janë paraqitur në zyrat e tyre në katin e katërt të Ministrisë së Shëndetësisë, kanë konstatuar dyert e dëmtuara, e të hapura me forcë. Ndërrimi i bravave dhe kalimi në heshtje i kësaj ngjarjeje, ngjan me një bashkëpunim në një akt banditizmi, e padëgjuar për një institucion shtetëror, që si çdo institucion tjetër ka edhe personel sigurie,” – shkruan Spahia.

Opozita këmbëngul se ngjarjet nuk janë të rastësishme.

“Të gjitha çuditë që ndodhin në Ministrinë e Shëndetësisë lidhen më një datë, 15 prillin 2020. Në këtë datë në mëngjes, punonjësit e katit të katërt përballen me zyrat e shpërthyera. Disa orë më vonë, shpërndahet një urdhër për të mos iu përgjigjur pyetjeve të gazetarëve. Ndërsa afro 5 orë pas mbarimit të orarit zyrtar, aktivizohet alarmi i zjarrit për shkak të djegies së dokumenteve në katin e zyrës së tenderëve, të njëjtin kat ku në mëngjes ishin konstatuar zyrat e shpërthyera me forcë,” – vazhdon më tej ish-deputeti demokrat ndërsa i kërkoi Ministrisë të japë shpjegime për këto ngjarje.

Prej muajit prill opozita ka denoncuar abuzimet me 17 tenderë, të cilat, sipas tyre, edhe pse nën gjendjen e fatkeqësisë natyrore janë zhvilluar në mungesë gare, transparence dhe me çmime disa herë më të larta se sa çmimi i tregut.

Qeveria i ka përgënjeshtruar të gjitha akuzat duke këmbëngulur se çdo gjë është bërë sipas ligjit dhe se ajo është e hapur për çdo hetim.

Lexoni gjithashtu:

PD këmbëngul se një zjarr në Ministrinë e Shëndetësisë dogji dokumente të tenderave sekretë

Akuzat për tenderat sekretë, ministria e Shëndetësisë: Të hapur për organet e drejtësisë

PD publikon dokumentin: Prova që fakton rënien e zjarrit në Ministrinë e Shëndetësisë

MSH-ja i përgjigjet PD: Akuza qesharake, po manipulon publikun Akuzat për tenderat sekretë, ministria e Shëndetësisë: Të hapur për organet e drejtësisë