Shtohen krimet seksuale, bixhozi dhe dhuna në familje

Krimet seksuale, bixhozi dhe dhuna në familje janë shtuar gjatë vitit që lamë pas.

Në raportin e kriminalitetit për vitin 2021 të Prokurorit të Përgjithshëm, krimet seksuale janë rritur me 16%.

Dhuna në familje ka pasur 1406 raste, 12% më shumë në krahasim me 2020-ën.

Bixhozi ilegal është rritur ndjeshëm në vitin 2021 pasi prokuroritë kanë hetuar 70% raste më shumë se një vit më parë, për veprimtaritë e lojërave të fatit.

Edhe mashtrimi si vepër penale ka njohur rritje me 20%, ndërsa me 10% më shumë u shtua edhe numri i hetimeve për kultivim hashashi.

Krimet kompjuterike gati janë dyfishuar, me 48% më shumë procedime penale.

Por ka edhe zëra të tjerë të kriminalitetit që kanë pasur tendencë në ulje, si krimet kundër jetës 14%, mjedisit 5% apo vjedhjes së pasurisë me 13%.

Në funksion të hetimeve, në vitin 2021 në Shqipëri janë përgjuar komunikimet elektronike të 3412 personave, mes tyre edhe zyrtarë të dyshuar për korrupsion dhe shpërdorim detyre.

Përqindjen më të ulët të koeficientit të kriminalitetit edhe për vitin 2021 e ka qarku Dibër, ndërsa përqindjen më të lartë qarku i Vlorës.

LEXONI GJITHASHTU:

• Vjedhja dhe dëmtimi i pronës, krimet që vuajnë më shumë qytetarët shqiptarë
• Krimet e rënda po ndodhin prej të metave në sistemin penal, thotë eksperti