Duhet ndalur procesi farsë i zgjedhjeve brenda partisë, apelon deputeti i PD

Deputeti i Partisë Demokratike, Lefter Gështenja thotë se në mbledhjen e fundit të grupit parlamentar pas 8 orë diskutimesh nuk ka pasur asnjë vendimmarrje për zgjedhjet brenda partisë dhe procesin e bashkimit.

Gështenja tha se ka paraqitur një iniciativë se si mund të arrihet bashkimi i partisë nga gjithëpërfshirja.

Sipas deputetit të Qarkut të Elbasanit, PD po bën hapa pas dhe duhet të ndërpresë procesin ‘farsë të zgjedhjeve brenda partisë’.

“Në 31 vite PD nuk duhet të bëjë regres, por progres. Sot që ne flasim PD ka bërë regres. Kjo u tha në grupin parlamentar nga shumica e deputetëve prezent. Ne nuk e kemi luksin të përjashtojmë, largojmë apo anashkalojmë qoftë dhe një demokrat”, tha Gështenja.

Deputeti demokrat propozon që grupit parlamentar të marrë në dorë procesin zgjedhor brenda PD.