Ndihma e qeverisë për krizën

Rreth gjysma e shqiptarëve nuk kanë informacion për paketën e rezistencës që ka ofruar qeveria. 55% e të anketuarve kanë dëgjuar për të ndërsa 42% jo.

Mes atyre që e njohin paketën e rezistencës, pjesa dërrmuese nuk mendon se ajo është e mjaftueshme. 85% mendojnë që nuk është e mjaftueshme.

Vetëm 6% e qytetarëve që njohin masat e qeverisë, i sheh ato si të mjaftueshme për mbulimin rritjes së shpenzimeve.

45% e shqiptarëve mendojnë se qeveria në këtë krizë po mbron interesat e oligarkëve dhe jo të popullit. Një në pesë shqiptarë (23%) nuk është dakord me këtë shprehje dhe më shumë se një në katër qytetarë (29%) nuk kanë një mendim apo nuk shprehen për këtë çështje.

Sipas shqiptarëve, zgjidhja më e mirë për krizën është caktimi i çmimeve tavan (38%). Më shumë se një në katër shqiptarë (28%) mendon se masa e duhur do ishte rritja e pagave dhe një në pesë shqiptarë (24%) sheh rritjen e pensioneve si masën e duhur për përballimin e krizës.

Gjetjet janë të sondazhit të Barometrit në Euronews Albania, kryer nga MRB dhe Data Centrum në datat 25 Mars deri në 5 Prill, në nivel kombëtar me 1000 intervista ballë për ballë.