‘S’ka shanse për paqe’, kreu i OKB-së: Lufta do vazhdojë gjatë

Sekretari i përgjithshëm i OKB-së, Antonio Guterres ka deklaruar se fundi i luftës në Ukrainë nuk duket ende në horizont. Në një konferencë shtypi në Vjenë, Guterres u tha gazetarëve se aktualisht OKB është e fokusuar në përpjekjet e evakuimit dhe shpërndarjes së ndihmave në zona si ajo e Mariupolit, të prekura nga lufta.

“Është e qartë për ne se në këto momente nuk ka shanse për një marrëveshje paqeje të menjëhershme, apo për një armëpushim global”, tha Guterres.

Avokatja ukrainase e Popullit, Liudmyla Denisova i kërkoi të mërkurën OKB-së dhe Kryqit të Kuq ndihmë për evakuimin e ushtarëve të plagosur, që po i bëjnë rezistencë agresionit ushtarak rus në impiantin Azovstal.

“E gjithë bota e qytetëruar duhet të shohë kushtet në të cilat ndodhen dhe veprojnë mbrojtësit e plagosur të Mariupolit. Pa ndihmë shëndetësore, me plagë të hapura, të lidhura me fasho të pista, pa medikamente dhe pa ushqim”, deklaroi Denisova.

Ndërkohë, disa bashkëshorte të ushtarëve ukrainas u takuan të mërkurën në Vatikan me Papa Françeskun, të cilit i kërkuan të ndërhyjë për të shpëtuar jetën e të dashurve të tyre që po luftojnë kundër forcave ruse.

“Ne i thamë Papës se 700 ushtarë janë plagosur, se kanë pësuar gjymtime, se plagët e tyre po rëndohen dhe se shumë prej tyre kanë vdekur dhe ne nuk i varrosim dot sipas traditave të krishtera. Ndaj i kërkojmë Papës të na ndihmojë, të bëhet palë e tretë në këtë luftë dhe të mundësojë evakuimet”, shprehet Yuliya Fedosiuk, qytetare ukrainase.

Ati i shenjtë, në grumbullimin në sheshin Shën Pjetër, mbajti edhe një lutje për paqen.

LEXONI GJITHASHTU:

• Guterres falenderon të gjithë ushtarët për evakuimin e njerëzve në Mariupol
• Guterres takon Zelenskin: Të mundësojmë korridoret humanitare