Sistemi parashkollor pa libra të certifikuara, mësuesit punojnë me fotokopje

Teksa viti i ri shkollor ka nisur, fëmijët 5 deri në 6 vjeç në sistemin parashkollor apo kopshte nuk kanë libra të posaçëm të certifikuara nga MASR.

Ky shqetësim është ngritur nga mësuesit, të cilët kanë kërkuar zgjidhje të situatës tek Ministria e Arsimit, Sportit dhe Rinisë.

Mësuesit e parashkollorit janë shprehur për Euronews Albania se janë të detyruar të punojnë me fotokopje apo materiale të organizuara prej tyre.

Ministrja e Arsimit,Sportit dhe Rinisë, Besa Shahini, nisur nga kjo ankesë, në deklaratën e saj pas nisjes së këtij fillim viti shkollor u ka bërë thirrje shtëpive botuese që të hartojnë pako librash të përshtatura për moshën 5-6 vjeç.

”Ne do u bëjmë thirrje botuesve, që duke përcjellë me përkushtim gjithë kurrikulën dhe programet tona të ndërtojnë edhe pakot e librave dhe mjeteve didaktike që do përdoren për këtë grupmoshë.”- tha Shahini.

Deri në kohën kur këto libra do certifikohen nga MASR, fëmijët do duhet të punojnë me materialet e sugjeruara nga vetë mësuesit.