‘Qeveria të pranojë rekomandimin e Komisionit të Venecias për antishpifjen,” nxit kryeredaktori i BIRN, Besar Likmeta

Kryeredaktori i Rrjetit Ballkanik të Gazetarisë Investigative, z. Besar Likmeta tha në studion e Euronews Tonight se opinioni i Komisionit të Venecias fliste qartë për këdo se ndikimi i projektligjit do të ishte mjaft negativ për median në Shqipëri dhe për lirinë e shprehjes.

Likmeta kritikoi nismën e qeverisë duke thënë se ajo nuk lidhet aspak me shpifjen, por ka të bëjë më shumë me kontrollin e përmbajtjes së medias online në Shqipëri.

“Ne shpresojmë që qeveria do ta dëgjojë rekomandimin e Komisionit të Venecias dhe do të ishte absurde që të vepronte në mënyrë të kundërt sepse kemi një prerokruzitë që gjatë viteve të fundit legjitimiteti i vendimeve të marra nga qeveria shqiptare… janë bazuar në opinione të komisionit të Venecias”, deklaroi Likmeta për Euronews Albania.

Gazetari i BIRN përsëriti disa nga arsyet pse projektligji u kundërshtua nga gazetarët, shoqëria civile dhe organizatat ndërkombëtare të medias duke përmendur paqartësitë në shkrimin e ligjit, lidhur me mediat e mëdha ose blogerët, gjobat e larta, pamundësia për apelimin e tyre etj.

“Opsioni më i mirë do të ishte vetërregullimi,” përfundoi Likmeta.

Lexoni gjithashtu

Zbardhet draft-opinioni i Komisionit të Venecias për “antishpifjen”: Është i pazbatueshëm!