Reagojnë mjekët pas deklaratës së zv. ministres së Shëndetësisë

Mjekët e ftuar në “Mirëmëngjes” në Euronews Albania reaguan pas deklaratës së zv.ministres së Shëndetësisë, Mira Rakacolli e cila u shpreh se mjekët nuk largohen as për pagat e as për kushtet e punës.

Mjeku Gent Stroni u shpreh se janë shumë arsyet që shtyjnë jo vetëm mjekët të ikin nga Shqipëria.

Infeksionisti sfidoi qeverinë që mjekëve që do të vijnë për konferencën t’ju ofrojë një kontratë si mjekëve turq në Fier.

Ndërkohë mjeku Negjyp Sopa tha se edhe në Kosovë si në Shqipëri trendi është i njejtë sa i takon largimit të stafit mjekësor.

“Organizimi dhe krijimi i kushteve janë problematike,” – tha ai ndërsa shtoi se nuk janë investime të mjaftueshme në mjekësi për aq kohë sa për disa ndërhyrje nuk ka kushte për t’i realizuar.

Mjekja Aurora Meta Dollenberg tha se eksodin e mjekëve e ka ndjekur që prej fillimit, madje është kujdesur që t’i informojë vazhdimisht kolegët për vendet ku kanë dëshirë të emigrojnë.

Ajo ra dakord me Rakacollin sa i takon fenomenit të emigrimit, sepse si mjekët shqiptarë edhe ata gjermanë largohen nga vendi. Meta Dollenberg theksoi se nga bisedat me kolegët ka qenë pasiguria nëse do e gjenin një vend specializimi ose jo ajo që i ka shtyrë të ikin nga Shqipëria.

LEXONI GJITHASHTU:

• Rakacolli: Prej 6 javësh, situatë e qëndrueshme epidemiologjike në vendin tonë