Përplasja Meta-Dvorani, EURALIUS dhe OPDAT: Japim asistencë, jo opinione

Ekspertët e Bashkimit Evropian dhe Shteteve të Bashkuara të Amerikës kanë refuzuar të japin opinionin e tyre lidhur me konfliktin mes Presidentit Ilir Meta dhe kreut të Këshillit të Emërimeve në Drejtësi, Ardian Dvorani.

Më 5 maj Këshilli i Lartë Gjyqësor (KLGJ) i ishte drejtuar misionit evropian të asistencës për konsolidimin e sistemit të drejtësisë në Shqipëri, njohur ndryshe si EURALIUS dhe përfaqësuesve Departamentit Amerikan të Drejtësisë (OPDAT) për të ndihmuar në sqarimin e përplasjes Meta-Dvorani.

Gazetari i Euronews Albania, Xhevahir Zhabina, tregoi se qëndrimi i tyre pritej pasi EURALIUS dhe OPDAT e konsideron atë një çështje personale dhe joparimore duke ia lënë tërësisht në dorë KLGJ-së vendimmarrjen për kërkesën e Metës për t’i ndërprerë mandatin si kryetar i KED-së Dvoranit.

Presidenti e ka arsyetuar kërkesën pasi me emërimin e 3 anëtarëve të ri në Gjykatën e Lartë, Dvorani duhet të lirojë postin e kryetarit të KED-së, pasi atij i ka përfunduar mandati i anëtarit të kësaj gjykate që në vitin 2014-të.

Dvorani pretendon mbajtjen e postit të tij teksa kjo çështje konsiderohet mjaft madhore pasi KED-ja ka në dorë renditjen e gjyqtarëve për në Gjykatën Kushtetuese.

Në të shkuarën Meta e ka kallëzuar për shpërdorim detyre Dvoranin pasi ky i fundit, sipas Presidentit shkaktoi përplasjen me Kuvendin në emërimin e anëtarëve të Kushtetueses.