Politika shqiptare reagon për procesin zgjedhor në Kosovë

Politika shqiptare ka përshëndetur zgjedhjet e qeta dhe demokratike, të cilat u mbajtën ditën e djeshme në Kosovë, ku sipas rezultateve të shpallura nga KQZ-ja në Kosovë, fitues është udhëheqësi i Partisë së Vetëvendosjes, Albin Kurti.

Udhëheqësit e lartë të Shqipërisë, përmes postimeve në rrjete sociale kanë shprehur urimet e tyre për të gjithë kandidatët që morën pjesë në zgjedhje.

Presidenti Meta, me anë të një postimi në Facebook është shprehur se zgjedhjet e djeshme në Kosovë, ishin një shembull i shkëlqyer i funksionimit të demokracisë, i besimit te demokracia dhe vota e lirë.

Më vonë, ka reaguar dhe kryeministri Rama me anë të një postimi në Twitter, ku ka uruar Albin Kurtin për rezultatin, gjithashtu nuk ka lenë pa përmendur dhe partitë e tjera për rezultatet e arritura.

Urime Kosovës për zgjedhjet e suksesshme parlamentare??Urime Vetëvendosjes e Albin Kurtit për rezultatin më të mirë. Urime LDK e Vjosa Osmanit për rezultatin e dytë më të mirë. Urime PDK e Kadri Veselit për pranimin shembullor të rezultatit. Sa më e mbarë dita e re për Kosovën?

— Edi Rama (@ediramaal) October 7, 2019

Zgjedhjet në Kosovë i ka komentuar dhe kreu i Partisë Demokratike, Lulzim Basha, i cili është shprehur se dje populli i Kosovës dha një shembull frymëzues me pjesëmarrjen civile dhe masive në zgjedhje, Policia e Kosovës tregoi profesionalizëm të lartë në ndalimin e menjëhershëm të atyre që cenuan sekretin e votës së lirë duke e fotografuar atë.

Më tej, Basha thekson se Kosova i dëshmoi botës se është një demokraci funksionuese.

Ditën e djeshme në Kosovë u mbajtën zgjedhjet e parakohshme vendore, të cilat erdhën si pasojë e dorëheqjes së ish-kryeministrit, Ramush Haradinaj.

Haradinaj, dha dorëheqjen për t’u përballur me marrjen në pyetje nga një gjykatë për krime lufte në Hagë.