Ukraina raporton për një sulm masiv nga Bjellorusia

Ukraina raportoi se është përballur me “bombardime masive” të shtunën nga Bjellorusia fqinje, aleate kjo e Rusisë, por jo e përfshirë zyrtarisht në konflikt.

Njëzet raketa kanë shënjestruar fshatin Desna në rajonin Çernihiv, sipas ushtrisë ukrainase, duke shtuar se infrastruktura është goditur, por ende nuk ka raportime për viktima.

“Sulmet e sotme janë të lidhura drejtpërdrejt me përpjekjet e Kremlinit për të përfshirë Bjellorusinë si bashkëluftëtare në luftën në Ukrainë”, ka thënë shërbimi ukrainas i inteligjencës.

Bjellorusia ka ofruar mbështetje logjistike për Moskën prej kur kjo e fundit ka nisur pushtimin e Ukrainës më 24 shkurt.

Veç Rusisë, Bjellorusia është përballur me sanksione të Perëndimit.

Sulmet kanë ndodhur para një takimi të planifikuar për të shtunën mes presidentit rus, Vladimir Putin dhe homologut të tij bjellorus, Alexander Lukashenko në Shën Petersburg.