Librat shkollorë nuk do shiten më nga mësuesit, çmimi në kopertinë

Të gjithë nxënësit e arsimit para universitar, në vitin e ri shkollor do t’i blejnë librat drejtpërdrejtë tek shtëpitë botuese në ambientet e shkollës dhe jo tek mësuesit.

Këshilli i Ministrave ka miratuar këtë të mërkurë vendimin, ku thuhet se “Procesi i shtypjes, botimit, shpërndarjes dhe shitjes së teksteve shkollore të arsimit para universitar bëhet nga shtëpitë botuese.”

Do të jenë drejtoritë e institucioneve arsimore që do të ofrojnë një ose dy mjedise shkollore, nga ku shtëpitë botuese do shesin librat.

Shtëpitë botuese do duhet të konkurrojnë dhe të marrin miratimin nga Ministria e Arsimit, se cilat libra do të mund të shiten.

Për të shmangur çdo manipulim të mundshëm në vendim thuhet se: “çmimi i shitjes është ai i vendosur në kopertinën e tekstit shkollor të certifikuar”.

Gjithashtu, për vitin e ri shkollor është miratuar mbulimi me libra falas për të gjithë nxënësit që vijnë nga situata të brishta social-ekonomike deri në klasën e 12-të.