15 kushtet për Shqipërinë në raportin e PE-së, amendamenti merr mbështetje nga PPE dhe një pjesë e të majtës ekstreme

Parlamenti Evropian votoi të enjten ndryshimet e propozuara në “Raportin për Ballkanin” të eurodeputetit Tonino Picula si dhe një amendament për Shqipërinë, amendament që u mbështet gjerësisht nga Partia Popullore Evropiane, liberalët, konservatorët dhe një pjesë e së majtës ekstreme.

Korrespondenti i Euronews Albania, Ernest Bunguri, tha se raporti përmban udhëzime për procesin e zgjerimit të rajonit, përshpejtimin e këtij procesi dhe fondet e mbështetjes për planet ekonomike dhe të zhvillimit.

“Por gjithashtu, krahas raportit është miratuar edhe një amendament për Shqipërinë, ku thuhet se 15 kushtet që i janë vënë Shqipërisë nga BE-ja duhen plotësuar përpara konferencës ndërqeveritare ku diskutohet për anëtarësimin,” – tha Bunguri i cili kujtoi se në kuadrin e bisedimeve vendosen edhe kushte të tjera, por që në raport me parakushtet ka pasur interpretime të ndryshme politike në Shqipëri.

“Çështja e kushteve, mbetet objekt interpretimi, a janë 15, a janë më pak, gjithsesi ajo që ka ndodhur në PE dhe rrëmuja e krijuar ka shkaktuar pakënaqësi te eurokomisioneri për zgjerim Olivér Várhelyi, i cili po shtyn për Shqipërinë dhe Maqedoninë e Veriut që të bëhet sa më parë konferenca e parë ndërqeveritare,” – sqaroi gazetari i Euronews Albania në një lidhje direkte.

Vlen të thuhet se raporti nuk ka fuqi vendimmarrëse, por është veçse raport udhëzues.

Lexoni gjithashtu:

Rama nuk ka 15 kushte për të shkuar në konferencën e parë ndërqeveritare

Integrimi në BE, Rama prezanton kryenegociatorin Mazi: Do jem avokati më i mirë i Shqipërisë

Këshilli Kombëtar i Integrimit, Rama dhe Meta ulen në tryezë, mungon opozita jashtëparlamentare