Malta mposht Shqipërinë, nis turneu evropian i verës në basketboll për femra

Ka nisur turneu europian i verës në basketbollin për femra në qytetin e Korçës, ku marrin pjesë Shqipëria, Malta, Andorra e Qipro.

Ndeshja e parë e kombëtares kuq e zi U16 ishte ndaj vajzave të Maltës, të cilat dukshëm dominuan dhe fituan ndeshjen.

Për trajnerin e maltezeve kjo ishte një fitore e pritur edhe pse vlerësoi ekipin shqiptar.

“E fituam ndeshjen e parë sepse askush nuk njeh skuadrat kundërshtare, ne bëmë goxha mirë edhe pse Shqipëria është një skuadër e fortë, urojmë të vazhdojmë kështu. Fuqia është fryma e grupit, 5 luajnë e 7 të tjera janë gati të luajnë,” tha Sandro Farrugia.

Trajneri i vajzave shqiptare ia faturon emocioneve gabimet e bëra gjatë ndeshjes. Sektori me problematik rezultoi  sulmi.

” Ndeshja e sotme ishte me shumë emocione për vajzat. E filluan goxha të emocionuara dhe filluan me gabime. Këto na kushtuan lojën, u munduam ta ndryshonim mbrojtjen, sulmi ishte pjesën e dytë që nuk ecën. Gabime të ndryshme në sulm, organizatoret nuk e udhëheqen lojën. Shpresoj që nesër mos bëjmë një lojë si kjo e sotmja,” tha Aleksandër Temo.

Demo vlerëson aktivitetin e zhvilluar në Korçë që bën bashkë disa ekipe basketbolli dhe thyen kufijtë.

“Kjo është një event mjaft i rëndësishëm për Shqipërinë e këto vajza. Sidomos që organizohet këtu. Është përvojë e jashtëzakonshme. Kanë vetëm 10 ndeshje si U16. E vlerësoj që u bë këtu dhe uroj që vazhdimësia të jetë ne favorin tonë,” – u shpreh ai.

Turneu do të zgjasë disa ditë, deri në shpalljen e ekipit fitues.

LEXONI GJITHASHTU:

• Ylli amerikan i basketbollit deklarohet fajtore për drogë në gjykatën ruse