Nënshkruhet protokolli mes Maqedonisë së Veriut dhe Bullgarisë

Këtë të dielë është mbajtur në Sofje mbledhja e dytë e Komisionit të Përbashkët Ndërqeveritar të Maqedonisë së Veriut dhe Bullgarisë.

Pas përfundimit të mbledhjes, është nënshkruar një protokoll nga ministrat e Jashtëm të dy vendeve, Bujar Osmani dhe Teodora Gençovska.

Ky protokoll paraqet procesverbal të mbledhjes së Komisionit që do të mundësojë forcimin dhe angazhimin dypalësh në promovimin e marrëdhënieve bilaterale.

Ministri Osmani tha se gjatë takimit janë vënë në dukje të gjitha aktivitetet dhe projektet që kanë rezultuar nga grupet e punës.

Ai theksoi se Maqedonia e Veriut ka marrë mbështetje të fortë për integrimin evropian, i cili do të realizohet ditët e ardhshme në Bruksel, nëpërmjet mbajtjes së Konferencës së Parë Ndërqeveritare.

Deputetet e Maqedonisë së Veriut miratuan të shtunën në parlament propozimin francez për hapjen e negociatave me Bashkimin Europian.

Propozimi mori 68 votat e maxhorancës, ndërkohë që deputetët e opozitës nuk morën pjesë në votim. Këta të fundit kanë paralajmëruar një protestë kundër këtij propozimi.

Propozimi francez përcakton se kërkesat e Bullgarisë për të futur në kushtetutën maqedonase minoritetin e saj, të kryhen pas mbajtjes së Konferencës Ndërqeveritare me Bashkimin Europian dhe hapja faktike e negociatave të ndodhë pasi këto ndryshime të kryhen.

LEXONI GJITHASHTU

• Video | Kuvendi i RMV-së miraton propozimin francez
• ‘Urime RMV’, presidentja e KE-së: Votimi i propozimit i hap rrugën negociatave