Italianët i bëjnë thirrje Draghit që të mos dorëhiqet

Kryebashkiakët e Italisë, organizatat e biznesit dhe drejtuesit e sindikatave i kërkojnë kryeministrit Mario Draghi që të rimendojë vendimin e tij e të mos dorëhiqet, duke paralajmëruar se stabiliteti i vendit, i mbingarkuar me borxhe është në rrezik.

Draghi dha dorëheqjen javën e kaluar pasi një nga partitë në koalicionin e tij Lëvizja 5-Yje, refuzoi të mbështeste qeverinë në një votëbesim parlamentar.

Presidenti Sergio Mattarella e refuzoi dorëheqjen dhe i kërkoi t’i drejtohej parlamentit më 20 korrik, duke shpresuar se do të gjente një konsensus për të shmangur zgjedhjet e parakohshme në një kohë trazirash ndërkombëtare dhe tensionesh ekonomike.

Draghi fitoi me lehtësi votën e besimit për një paketë masash që synojnë të lehtësojnë koston e lartë të jetesës për familjet dhe kompanitë  por 74-vjecari tha se pa mbështetjen e plotë të të gjithë partnerëve, qeveria e unitetit kombëtar nuk mund të vazhdonte.

Partia populiste 5-Yje, deklaron se nuk është tërhequr nga koalicioni, por i ka bërë thirrje Draghit t’i japë garanci se do të zbatojë prioritetet e politikës së tij, të tilla si paga minimale.

Një burim në zyrën e kryeministrit tha se Draghi nuk do të përkulet para asnjë “ultimatumi” dhe mbetet i vendosur për të dhënë dorëheqjen.

Por ish kreu i Bankës Qendrore përballet me shumë presion për të ndryshuar qëndrim, pas paralajmërimeve  se shteti fqinj rrezikon të humbas  miliarda euro në fondet e rimëkëmbjes pas pandemisë dhe  pa një qeveri funksionale kriza e inflacionit do të bëhet edhe më e vështirë.

LEXONI GJITHASHTU

• Dorëheqja e Draghit, analistët: Përfiton ekstremi i djathtë
• Presidenti Mattarella refuzon dorëheqjen e kryeministrit Draghi
• Jep dorëheqjen Mario Draghi