Frikë nga vala e dytë. Britani, ekspertët thirrje qeverisë

Një ditë pasi kryeministri britanik njoftoi ndryshimet e masave të bllokadës anti-Covid, ekspertët e shëndetësisë paralajmërojnë se vendi mund të jetë i papërgatitur për një valë të dytë.

Në një letër të hapur të publikuar në Gazetën Mjekësore Britanike, ministrat janë vënë në dijeni se provat në dispozicion tregojnë se vatra të reja ka gjasa të verifikohen dhe se vala e dytë përbën një rrezik real.

Në kulmin e epidemisë, stafet e spitaleve u ankuan se nuk kishin mjaftueshëm veshje mbrojtëse dhe pajisje. Autorët e letrës kanë paralajmëruar se nevojitet një aksion urgjent për t’u përgatitur për një valë të dytë, me qëllim shmangien e humbjes së jetëve.

Teksa Belgjika ka nisur lehtësimin e masave sociale, kryeministrja e saj u ka bërë thirrje qytetarëve të mos rrezikojnë me grumbullime të mëdha, sikurse ndodhi fundjavën e kaluar në një festë.

“Virusi nuk është i lehtë as për të rinjtë. Organizimi i eventeve të tilla favorizon përhapjen e virusit. Nëse bëni një veprim përmes të cilit rrezikoni veten tuaj, ju rrezikoni edhe njerëzit rreth jush. Mos e harroni këtë”, ka apeluar kryeministrja Sophie Wilmes.

Vende të ndryshme po përjetojnë shpërthimin e COVID-19, përfshirë Portugalinë. Qeveria është detyruar të rivendosë kufizimet në kryeqytetin Lisbonë.

Të gjitha aktivitetet tregtare duhet të mbyllen në 8 të mbrëmjes, me përjashtim të restoranteve. Grumbullimet publike me mbi 10 vetë janë ndaluar sërish, me shkelësit e rregullave që do të dënohen për veprën penale të “mosbindjes”.