Rusia kërkon aleatë në Afrikë, Lavrov takohet me zyrtarët egjiptianë

Ministri i Jashtëm rus Sergey Lavrov nisi bisedimet me zyrtarët egjiptianë, ndërsa vendi i tij kërkon të thyejë izolimin diplomatik dhe sanksionet e Perëndimit, pas pushtimit të Ukrainës.

Lavrov mbërriti në Kajro të shtunën, në hapin e parë të turit të tij afrikan që gjithashtu përfshin ndalesa në Etiopi, Uganda dhe Republikën Demokratike të Kongos.

Lavrov fillimisht u takua me presidentin egjiptian, Abdel Fattah el-Sissi në pallatin presidencial dhe më pas me homologun e tij, Sameh Shukry.

Në konferencën e përbashkët për shtyp, Shukry bëri thirrje për një zgjidhje diplomatike dhe politike të konfliktit në Ukrainë.

“Kemi konfirmuar angazhimin e eksportuesve rusë të grurit që të përmbushin detyrimet. Presidenti Vladimir Putin gjithashtu e theksoi këtë në një bisedë telefonike me presidentin egjiptian. Sa i përket prodhimit të ushqimit, kolegët tanë perëndimorë, që e kanë marrë shumë seriozisht situatën, duhet të heqin pengesat që kanë krijuar vetë,” – u shpreh Lavrov.

Ministri i jashtëm rus fajësoi Ukrainën për ndërprerjen e bisedimeve për paqen.

“Ukrainasit po inkurajohen vazhdimisht për këtë pikë nga mbikëqyrësit e tyre perëndimorë, në Londër, Uashington dhe shumë kryeqytete të BE-së dhe NATO-s,” – tha ai.

Lufta e Rusisë në Ukrainë ka shkaktuar ndikime të mëdha në ekonominë botërore, duke çuar çmimet e naftës dhe gazit në nivele të paprecedente.

Ukraina është një nga eksportuesit më të mëdhenj të grurit, misrit dhe vajit të lulediellit, por pushtimi dhe bllokada e porteve i ka ndalur furnizimet.

Lavrov do të bisedojë gjithashtu edhe me Sekretarin e Përgjithshëm të Ligës Arabe Ahmed Aboul Gheit dhe do t’i drejtohet organizatës pan-Arabe.

LEXONI GJITHASHTU:

• SHBA furnizon Ukrainën me armë, reagon Lavrov