Radhë të gjata në port, tragetet e Durrësit të mbushura gjatë sezonit turistik

Porti i Durrësit është duke u përballur me një fluks të lartë pasagjerësh dhe mjetesh që hyjnë dhe dalin çdo ditë.

Mbi 50,000 persona më shumë krahasuar me një vit më parë kanë hyrë në portin e Durrësit deri në qershor të këtij viti.

Përgjatë 6 mujorit të parë të vitit, tragetet në portin më të madh detar në vend kanë kryer 440 lundrime vajtje-ardhje. Ato kanë transportuar 515,439 udhëtarë dhe 43,378 komionë, mjete dhe trailera.

Kjo shifër reflekton një rritje me 12% krahasuar me janar-qershorin e vitit 2021, kur u transportuan 462,260 pasagjerë. Vetëm në qershorin e vitit që lamë pas u përpunuan 36, 468 udhëtarë, përkundrejt 44,037 të tjerëve të përpunuar në qershor të këtij viti.

Këtë fluks e reflektojnë edhe shifrat pozitive të këtij korriku. Sipas të dhënave nga Autoriteti Portual, vetëm fundjavën që lamë pas, janë përpunuar 12,755 pasagjerë, mes të cilëve 10 176 kanë hyrë në vendin tonë.

Gjithashtu janë përpunuar dhe 3 822 mjete, trailera dhe kamionë.

“Me qëllim përballimin e fluksit të lëvizjeve, që aktualisht është i përqëndruar në hyrje, nga data 21 korrik kanë hyrë në veprim lundrimet ‘dopio corse’, pra vajtje-ardhje brenda ditës, nga Porti i Durrësit drejt porteve italiane.”

LEXONI GJITHASHTU

• Turistët e huaj zgjedhin Korçën, preferojnë turizmin malor
• ‘Të paktën €100 euro/ditë’, rregulli i ri për të hyrë në Spanjë inatos turistët