Ambasadori i SHBA në Beograd: Asosaconi të jetë në agjendën e takimit Kurti-Vuçiç

Ambasadori i Shteteve të Bashkuara të Amerikës në Beograd, Christopher Hill ka thënë se formimi i Asosacionit të komunave me shumicë serbe në Kosovë, duhet të jetë në agjendën e takimit të kryeministrit të Kosovës, Albin Kurti dhe Presidentit të Serbisë, Aleksandër Vuçiç më 18 gusht në Bruksel.

Gjatë një interviste për RTS (Radio Televizioni Serb), Hill u shpreh se Asosacioni është paraqitur që në fillimin e procesit të dialogut mes dy vendeve dhe se në lidhje me të, duhet të gjendet një qasje.

“Mendoj se zoti Gabriel Escobar vuri në dukje një gjë shumë të rëndësishme. Meqenëse asosacioni është parashikuar që në fillim të gjithë këtij procesi, është mirë t’u kujtojmë të gjithëve se duhet të jetë në rend dite dhe se duhet gjetur një qasje për të.

Në mënyrë të pashmangshme është pyetja se cila është e ardhmja e komunitetit serb në Kosovë, sa të sigurt ndihen serbët në Kosovë, a duan të qëndrojnë në Kosovë”, theksoi diplomati.

Kosova dhe Serbia më 2013 kanë arritur Marrëveshjen fillestare për Asosacionin.

Ndërsa, më 2015 palët kanë nënshkruar edhe Marrëveshjen mbi parimet për krijimin e komunave me shumicë serbe.

LEXONI GJITHASHTU

• Prishtina dëshiron të sulmojë veriun e Kosovës, thotë Vuçiç
• Kurti: Serbia mund të na sulmojë, por ne jemi gati
• Mediat serbe: Kurti dhe Vuçiç pritet të nënshkruajnë deklaratë për të pagjeturit