Apeli i Metës: Koha për vepra të mira, përballimi i pandemisë dhe plotësimi i kushteve të bëhen objektiva madhore

Presidenti Ilir Meta apeloi të enjten që palët politike të heqin tensionin që po vazhdon prej kohësh t’i japin zgjidhje çështjes së mirëmenaxhimit të pandemisë dhe të plotësojnë kushtet e vendosura për nisjen e bisedimeve për anëtarësim në Bashkimin Evropian.

Përmes një postimi në Facebook, Meta paralelizoi situatën në Shqipëri me atë në Maqedoni të Veriut, ku sipas tij “nuk ka tensione artificiale” pavarësisht se vendi atje shkon në zgjedhje javën e ardhshme.

“Verbëria për mbajtjen apo marrjen me çdo çmim të pushtetit na ka bërë që të dukemi me fqinjin tonë lindor sikur u përkasim dy kontinenteve të largëta. Ndërkohë që edhe pandemia është në rritje së bashku edhe me deficitin dhe borxhin publik,” – shkroi Meta në Facebook.

Presidenti këshilloi që të mos humbet më kohë në përmbushjen e kushteve për çeljen e negociatave në mënyrë që “të ecim së bashku me fqinjët tanë drejt Bashkimit Evropian”.

“Përballimi i pandemisë dhe plotësimi i kushteve duhet të jenë dy objektivat madhore për të gjithë.E para mbron shëndetin dhe jetën e çdo qytetari, ndërsa e dyta shpëton të ardhmen europiane të vendit për të cilën të gjithë përbetohen me fjalë dhe programe. Koha për vepra të mira është tani!” – shkroi në fund Presidenti.