Thatësira më e keqe në 500 vjet, KE analizon me shqetësim situatën

Liqeni Brenets, i ndodhur në kufirin franko-zviceran është shembull i thatësirës së ashpër në Evropë. Ai u shfaq mbi 12 mijë vjet më parë, në masivin nënalpin të Jurës dhe ishte rreth 18 metra i thellë, por këtë verë ai thuajse është zhdukur tërësisht.

Në Bruksel, pasojat e shumëfishta të verës së nxehtë po analizohen me shqetësim.

 “Buletini i fundit mbi korrjet vë në dukje se moti jashtëzakonisht i nxehtë dhe i thatë në pjesët dërrmuese të Evropës vazhdon të reduktojë parashikimet për rendimentin nga kulturat e stinës. Sipas shkencëtarëve të Komisionit, moti pritet të mbetet i ngrohtë dhe më i thatë se zakonisht në rajonin e Mesdheut perëndimor deri në nëntor. Thatësira aktuale është më e keqja e 500 viteve të fundit,” – u shpreh Johannes Bahrke, zëdhënës i Komisionit Evropian.

Por thatësira nuk ka të bëjë vetëm me korrjet. Qytete dhe fshatra të shumta evropiane, si Lë Bushet San Nikol, në jug-lindje të Francës, kanë probleme me furnizimin me ujë dhe bazohen tek shpërndarja me autobot.

 “Një mëngjes nuk kishte fare ujë. Për hotelin dhe klientët e barit përdorëm ujë me shishe, në mënyrë që ata të lanin dhëmbët dhe të mund të bënin kafenë,” – tregoi Fabien Rochedy, pronar i një hoteli.

Niveli i ulët i liqeneve dhe lumenjve po shkakton probleme serioze ambientale, me vdekshmëri të lartë të peshqve dhe duke penguar transportin ujor.

Gjithashtu, pyjet dhe fushat e Evropës po vuajnë pasojat e të nxehtit dhe thatësirës duke u përballur me zjarre të shpeshta. Sipas Observatorit Evropian të Thatësirës, 47% e territorit është ende në kushte të rënda, ndërsa 17% në gjendje alarmante. 

LEXONI GJITHASHTU:

• Thatësira ekstreme po godet njëherësh 3 ekonomitë më të mëdha në botë