Pasuritë ilegale, memorandum bashkëpunimi mes institucioneve për krimet financiare

Nisur nga vlerësimet negative të organizatave ndërkombëtare sa i takon nivelit të pastrimit të parave , agjencitë ligjzbatuese kanë firmosur një memorandum të ri bashkëpunimi. Në fokus do të jetë edhe financimi i terrorizmit dhe sekuestrimi i aseteve kriminale.

Shqipëria është renditur në zonën “gri” nga “Moneyval” duke u cilësuar vend me mangësi strategjike në luftën kundër pastrimit të parave. Për këtë por edhe rekomandimet e tjera të organizatave ndërkombëtare, ministria e brendshme, ajo e financave dhe   prokuroria e përgjithshme firmosën një memorandum bashkëpunimi. Kryeprokurori Olsian Çela tha se ka ardhur koha për unifikim hetimesh.

“Do të shmangim njëherë e mirë hedhjen e fajit për mos funksionimin e gjërave tek njëri institucion apo tjetri. Unë mendoj se sot ne kemi arritur nivelin e duhur të pjekurisë institucionale për të marrë përsipër përgjegjësi”, tha z. Çela.

Ministri i brendshëm Sandër Lleshaj solli si shembull pozitiv sekuestrimin e rreth 100 milion eurove pasuri në vitin 2019, por shprehu pakënaqësinë se shumica e kësaj vlere në fund nuk konfiskohet.

“Kemi një diskarpancë të madhe midis asaj që sekuestrohet dhe asaj që konfiskohet dhe burimi i kësaj diskarpance është i shumëllojtë, të gjithë kanë kontribut nga pak, policia, prokuroria, gjykata, gjë që na sjellë në këtë situatë ku jemi përballë institucioneve ndërkombëtare”, tha z. Lleshaj.

Ndërkohë ministrja e financave Anila Denaj tha se për të dalë nga monitorimi i zgjeruar i “Moneyval”, Shqipërisë i nevojiten rezultate konkrete pasi kuadri teknik dhe nismat ligjore janë vlerësuar si pozitive.