Meta takohet sërish me Bashën: Ndryshimet kushtetuese të trajtohen në Këshillin Politik

Presidenti Meta ka zhvilluar paraditen e sotme një takim tjetër me kryetarin e Partisë Demokratike, Lulzim Basha.

Vetë kreu i shtetit e njoftoi këtë takim ku theksoi se ishte informuar mbi qëndrimin e opozitës së bashkuar sa i përket ndryshimet kushtetuese që po ndërmerr parlamenti.

Presidenti Meta e ka konsideruar si tepër konstruktiv qëndrimin e opozitës se çdo ndryshim kushtetues për reformën zgjedhore duhet të bëhet sipas marrëveshjes politike të 14 janarit në tryezën e këshillit politik.

“Sot në mëngjes, pa gdhirë mirë, i kërkova takim z.Basha për të parë a ishte i hapur për një ide të tillë.

Ai më njohu me qëndrimin zyrtar të Partisë Demokratike dhe Opozitës së Bashkuar që është bërë publik dhe u është njoftuar dhe të gjithë partnerëve të shqetësuar për të ardhmen europiane të vendit tonë.

Jam i bindur se ka kaq shumë intelektualë dhe qytetarë që ndajnë këtë shqetësim si të Prof.Kumes. Për këtë arsye po e ndaj me të gjithë ju këtë qëndrim tepër të përgjegjshëm dhe bashkëpunues të Opozitës së Bashkuar”, shkroi kreu i shtetit në Facebook.

Lexoni gjithashtu:

Ndryshimet kushtetuese për Kodin Zgjedhor, Presidenca i përgjigjet Ramës: Mos kini frikë nga qytetarët

Rama: Marrëveshja e 5 qershorit nuk preket në asnjë pikë. Nuk i kemi hequr koalicionet, i kemi bërë si Gjermania

Alket Hyseni: Listat e hapura dhe koalicionet janë dy gjëra që nuk mund të qëndrojnë bashkë