Frikë nga infektimi, autoritetet në Barcelonë thirrje qytetarëve: Qëndroni në shtëpi!

Rreth 4 milionë banorëve të zonës metropolitane të Barcelonës u është bërë thirrje të qëndrojnë në shtëpi në 15 ditët e ardhshme, për të ndalur rritjen e rasteve me COVID-19.

Autoritetet rajonale të Katalonjës insistuan gjithashtu për nevojën e shmangies së grumbullimeve prej më shumë se 10 vetësh.

“Qytetarët e të gjitha njësive bashkiake të përfshira duhet të qëndrojnë në shtëpi, veç rasteve urgjente. Kjo është kërkesa jonë, varet nga ju nëse infektimi përhapet ose jo në rajon”, deklaroi Meritxell Budo, zëdhënëse e qeverisë katalanase.

“Infektimet po verifikohen kryesisht në familje dhe grumbullimet shoqërore të aktiviteteve ditore. Objektivi ynë është reduktimi i këtyre aktiviteteve”, theksoi Alba Verges, shefe e Shëndetit Publik.

Eventet kulturore dhe ato sportive do të kufizohen gjithashtu. Autoritetet kanë dhënë në ditët e fundit rekomandime edhe për spitalet e Barcelonës, si dhe për të paktën 12 njësi të tjera bashkiake.

Për momentin bëhet fjalë për rekomandime, që megjithatë janë një hap përpara drejt masave më drastike, pasi shifrat e frikshme të infektimit po rikthehen.