Pronarë e këngëtarë vijojnë protestën kundër mbylljes së klubeve dhe lokaleve

Përmes një akti normativ, qeveria shqiptare vendosi  dje të mbyllë klubet e natës, diskotekat dhe ‘lounge-bar’-et duke paralajmëruar gjobitjen me 3 milionë lekë për cilindo sipërmarrës që nuk zbaton këtë vendim.

Po kështu është vendosur të ndalohet muzika për çfarëdolloj aktiviteti pas orës 20:00, gjë që nëse shkelet do të gjobitet me 1 milionë lekë.

Kjo masë e re nuk është pritur mirë nga pronarët e këtyre subjekteve, të cilët protestën e dijshme të nisur para kryeministrisë po e vijojnë edhe këtë të martë. Ky vendim i tyre ka çuar në përplasje me Policinë, madje disa prej tyre janë shoqëruar në komisariat për mosbindje ndaj uniformave blu.

Gazetarja e Euronews Albania, Ortensa Budlla raporton se protestës së pronarëve të bareve dhe diskove i janë bashkuar këngëtarë dhe muzikantë, të cilat shprehen kundër masave bllokuese të qeverisë.

Protestuesit kanë kërkuar që qeveria të rishikojë këtë vendim, pasi siç theksojnë, kjo masë strikte do t’i çojë drejt falimentimit.

Autoritetet shëndetësore janë shprehur se kjo masë është marrë pasi shumë subjekte nuk kanë respektuar masat dhe protokollin higjieno-sanitar anti-covid, të përcaktuar nga strukturat shëndetësore.

Policia e Tiranës njoftoi se ka shoqëruar 12 persona për protestën e zhvilluar para kryeministrisë, të cilët akuzohen për “organizim tubimi të paligjshëm” dhe “pengim të qarkullimit të automjeteve”.