20 nëntori, Dita Ndërkombëtare për të Drejtat e Fëmijëve

“Ktheni fëmijët tanë në shtëpi”- kjo ishtë një ndër pankartat e organizatave në mbojtje të të drejtave të fëmijëve në marshimin e mbajtur sot në Ditën Ndërkombëtare për të Drejtat e Fëmijëve.

Në shenjë të kësaj dite, shoqëria civile ka marshuar për të ndërgjegjësuar qeverinë, politikanët dhe shoqërinë.

“Mbi 80% e fëmijëve deklarojnë se të drejtat e tyre nuk respektohen. Kjo është një shifër e frikshme, e cila duhet të meret në konsideratë urgjente nga qeveria dhe institucionet e saj”- ka deklaruar, Altin Hazizaj, drejtori i CRCA. (Qendra për Mbrojtjen e të Drejtave të Fëmijëve në Shqipëri)

Sipas rrjetit kombëtar për të rinjtë në Shqipëri CRCA/ECPAT, fëmijët nuk po mbrohen mjaftueshëm nga dhuna dhe shfrytëzimi seksual, skllavëria dhe përdorimi për punë të rëndë e të detyruar.

Marshimi, i cili nisi para Ministrisë së Shëndetësisë, Mbrojtjes Sociale dhe përfundoi tek Kryeministria, kërkoi nga qeveria që të zbatohet Konventa për të Drejtat e Fëmijëve.