Eksperti: VKM-ja për ndërtimet pa leje, masë ekonomike për të ndalur abuzimet

Eksperti i ekonomisë, Fatos Çoçoli e shikon si një masë ekonomike për të ndalur abuzimet, VKM-në e qeverisë për konfiskimin e ndërtimeve pa leje apo blerjen e tyre nga ndërtuesi.

Në një intervistë për “Euronews Albania”, Çoçoli u shpreh se kjo nuk mund të konsiderohet amnisti.

“Amnistia është të falësh. Unë po flas me frymën e një veprimi që është shumë i kushtueshëm ekonomikisht për të frenuar këtë babëzi, për ndërtime pa leje, shtesa katesh në të gjithë territorin e vendit tonë. Këtë unë e shoh si një masë ekonomike për ta bërë të pamundur blerjen e tyre. Ka shumë gjoba, ka shumë referime për çmimin e tregut në lidhje me riblerjen, pra nuk është falje”, theksoi ai.

Qeveria do konfiskojë ndërtimet pa leje përmes një marrëveshjeje blerjeje me 1 euro tek ndërtuesi dhe mandej, Këshilli Kombëtar i Territorit do të legalizojë shtesën apo ndërtimin duke nxjerrë lejen përkatëse.

Institucioni që konstaton objektin a shtesën pa leje, IKMT, nis procedurat për konfiskimin dhe legalizimin e objektit, por nuk bën kallëzim në prokurori për ndërtuesin.

Padia nuk ngrihet as nga ndonjë institucion tjetër, duke përjashtuar ndërtuesit nga dënimi.

LEXONI GJITHASHTU

• Ndërtuesit i shpëtojnë burgut, qeveria nuk ngre padi për shkelësit
• Zaptimi i Liqenit Artificial, si u shtuan ndërtimet dhe katet e pallateve në 30 vite