Rama i përgjigjet Metës: Po përdor zyrën e Presidentit si llogore të luftës politike

Pas deklaratës së bërë nga Presidenti i Republikës se ndryshimet e Kushtetutës së miratuara sot në Parlament cenojnë marrëveshjen e 5 qershorit dhe integrimin në BE si dhe janë antikushtetuese, ka ardhur dhe përgjigjja e kryeministrit, Edi Rama. Kryeministri thotë se, z. Meta nuk i ndalon dot këto ndryshime në ligjin themeltar të shtetit dhe i bën thirrje që të tregohet serioz si President.

“Ilir, ti je një shkelës recidiv i Kushtetutës sipas Venecias, por po sipas Venezias e ke shkelur, po jo aq rëndë Kushtetutën sa për t’u shkarkuar! Dhe ne që shkeljet e tua i mbajtëm në kurriz, respektuam Venecian e s’të shkarkuam, sepse jemi të përgjegjshëm në përfaqësimin e vendit!

Por siç nuk i ndalove dot zgjedhjet vendore dhe siç nuk e fute dot në zjarr Shqipërinë dje, nuk ke asnjë shans ta ndalosh Kushtetutën e Shqipërisë të jetë detyruese edhe për ty, ashtu sikundër s’ke asnjë shans të ndezësh zjarrin e ëndërruar të konfliktit të popullit me shtetin.

Prandaj boll u bëre dhe na bëre të gjithëve qesharakë si shtet, duke e përdorur zyrën e Presidentit si llogore lufte politike, duke sharë ambasadorët siç bënte Haxhi Qamili e duke i folur vetes në vetë të tretë si Luigji XIV! Boll se s’të ka askush asnjë borxh, jo më Shqipëria”, shprehet z. Rama.

Ndryshimet Kushtetuese në Parlament u votuan nga 106 deputetë pas rreth 3 orë diskutime. Ndryshimet kanë të bëjnë me hapjen e listave të kandidatëve dhe ndryshimin e mënyrës së formimit të koalicioneve parazgjedhore.

Lexoni gjithashtu:

Ndryshimi i Kushtetutës, Meta: I papranueshëm, hedh në erë besimin mes palëve dhe procesin e integrimit

Kuvendi ndryshoi kushtetutën, Basha: Asgjë s’e ndal koalicionin mbarëpopullor kundër Ramës

Rama mbron ndryshimet kushtetuese duke replikuar deklaratat e Yuri Kim

Kuvendi miraton ndryshimin e Kushtetutës