Manja i përgjigjet Tabakut për SPAK: Ata që e sulmojnë i ke në krahun tënd

Ministri i Drejtësisë, Ulsi Manja u përplas gjatë debateve në Kuvend me deputeten demokrate Jorida Tabaku lidhur me punën e Prokurorisë së Posaçme, SPAK.

Në përgjigje të deklaratës së Tabakut se pse SPAK nuk po lejohet të bëjë detyrën, Manja tha se ata që po e sulmojnë strukturën e Posaçme janë të krahut të saj.

“Për zonjën Tabaku, e dëgjova në replikë, por kam përshtypjen se e ke për krahun tënd. Ata që e sulmojnë SPAK janë te krahu juaj, i ke pas vetes. Unë e kam thënë që duhet një vijë ndarëse aty. T’i them këtu se kush e pengon SPAK. Sa për të tjerat, raporti me drejtësinë është i tillë, sa herë të ketë punë me këtë mazhorancë ne i jemi përgjigjur. Ndërsa ky krahu këtej i ka shpëtuar drejtësisë me procedurë dhe raporte mjekësore”, tha ministri.

Tabaku replikoi me Manjën duke i kujtuar dosjet 184/339 dhe duke e akuzuar se ka kërcënuar SPAK.

“Pse e kërcënoni SPAK-un zoti Manja? Pse nuk e lini që të kryej punën e vet për të cilën e kemi votuar ne si deputetë të këtij parlamenti? Pse sot SPAK-u është bërë organi më i sulmuar nga të gjithë ata që sot kanë një dosje në Prokurori? Për çfarë ndodh kjo? Ku është parë ndonjëherë që nga organizata politike, parti politike, të sulmohen organet e drejtësisë dhe të jepet urdhër se çfarë të bëhet, çfarë të hetohet? Për mua do të ketë drejtësi zoti Manja, në qoftë se të gjithë ata që kanë një dosje me akuza të vërtetuara ashtu siç është 184 dhe 339 do të jenë përpara drejtësisë”, tha Tabaku.

LEXONI GJTHASHTU:

• Ndërpritet Parlamenti, Felaj quan Jorida Tabakun ‘grifshë’
• Ulsi Manja ironizon deklaratën e Metës për inceneratorët: Nuk ka faj i shkreti