‘Bota demokratike në rrezik’, Macron: Destabilizimi po kërcënon shoqëritë tona

Presidenti francez, Emmanuel Macron, ka paralajmëruar se demokracitë në mbarë botën, përfshirë atë në Shtetet e Bashkuara, ndodhen në krizë pas vitesh të tëra presionesh dhe destabilizimi.

I pyetur në një intervistë për CNN, nëse është i shqetësuar edhe për Amerikën, Macron është përgjigjur se është i shqetësuar për të gjithë.

“Urrej të mbaj leksione dhe t’u them njerëzve se jam i shqetësuar për ju, por besoj se në lojë është ajo që ndërtuam në shekullin e 18-të”, ka deklaruar Macron.

Lideri francez i ka mëshuar tezës së tij duke cituar trendin në rritje të nacionalizmit dhe populizmit, si dhe përhapjes së racizmit në Evropë dhe Shtetet e Bashkuara.

“Mendoj se jemi në një krizë të madhe demokracie. E kam fjalën këtu për ato që janë demokraci liberale. Përse? Së pari sepse duke qenë shoqëri të hapura dhe shumë bashkëpunuese, vendosja e popujve nën presion mund t’i destabilizojë ata”, ka thënë Macron.

Për këtë arsye, ka vijuar ai, duhet të respektojmë gjithmonë vullnetin e popullit, kërkesat e klasës së mesme dhe mikpritjen e kulturave të ndryshme, pasi gjithçka është një çështje balance.

Sipas shefit të pallatit Elize, gjatë viteve të fundit presioni ndaj shoqërive demokratike është rritur dhe vende të ndryshme të Evropës kanë hyrë në atë që e kanë quajtur “krizën e shtresave të mesme”.

Komentet e Macron i bëjnë jehonë përpjekjes së presidentit Joe Biden për t’i dhënë formë konkurrencës globale të shekullit të 21-të, e përcaktuar me formulën “demokracitë kundër autokracive”.

Presidenti francez komentoi edhe dekretin për mobilizimin ushtarak të presidentit rus Putin, duke e cilësuar atë një gabim dhe një shans të humbur për të ecur drejt paqes.

LEXONI GJITHASHTU

• ‘Rilindje’, partia e Emmanuel Macron ndryshon zyrtarisht emrin

• Macron njofton debat kombëtar për legalizimin e eutanazisë
• ‘Tregoni gatishmëri për vendime të vështira’, Scholz-Macron letër Kurtit