Gazetari: Kukësi një ‘kala politike’ që Rama synon ta mbajë përmes Majkos

Gazetari Denis Dyrnjaja, në një intervistë për Euronews Albania, është shprehur se rikthimi i Pandeli Majkos në Kukës është një gjetje strategjike nga ana e kryeministrit Edi Rama.

Dyrnjaja më tej theksoi se Kukësi është një ‘kala politike’ që Rama synon ta mbajë, dhe sipas tij Majko do të ishte një kapital i fortë politik për këtë qark.

“Besoj rikthimi i Majkos në Kukës është një gjetje strategjike për shkak se në atë rrethinë Majko gëzon një lloj popullariteti për shkak të qëndrimit të tij mbi Kosovën. Ka një lloj ndjeshmërie pozitive. Kukësi është një kala politike që Rama synon ta ketë dhe ta mbajë.

Rama ka kuptuar se duhen marrë masa për  të mos e humbur Bashkinë e Kukësit, pasi Gjici duhet t’i ketë pasur të lëkundura kapitalet politike për ta mbajtur Bashkinë. Majko do të ishte një kapital i fortë politik. Duke i dhënë një mundësi Majkos, Rama tregon se nuk është ai që heq xhaketat e vjetra. Janë lojëra politike që Rama i bën herë pas here”- deklaroi gazetari.

Pandeli Majko ka marrë një detyrë të re, duke u vendosur drejtues i qarkut të Kukësit.

LEXONI GJITHASHTU: 

• Gazetari: Rama s’merr në kurriz askënd kur vjen puna te kostoja e tij politike
• “Çoi informacione te Meta për inceneratorët”, gazetari flet për krisjen Rama-Ahmetaj