Ministria e Jashtme kujton se pikat doganore me Greqinë do të funksionojnë vetëm ditën

Ministria e Jashtme kujtoi sot se pikat e kalimit kufitar me Greqinë do të punojnë vetëm ditën, ndërkohë që prej datës 16 gusht kushdo që hyn në territorin grek do të duhet të vihet për 7 ditë në karantinë.

Në një deklaratë për shtyp ministria theksoi se deri në një njoftim të dytë doganat e Kapshticës dhe Kakavijës do të punojnë vetëm nga ora 06:00-22:00.

Autoritetet luten që qytetarët që do të lëvizin drejt Greqisë të shmangin lëvizjet gjatë orareve ku doganat janë të mbyllura pasi nuk do të lejohen nga policia kufitare të parkojnë apo qëndrojnë rreth territorit doganor.

Prej fillimit të muajit gusht kalimi kufitar me Greqinë është kufizuar. Lejohen të kalojnë vetëm shtetasit grekë, shqiptarët me rezidentë në Greqi dhe minoritarët që mund të gëzojnë dyshtetësinë.

Kufizimi i orareve të punës ka shkaktuar grumbullime të mëdha në pikat doganore gjatë ditëve ku mjaft emigrantë shqitparë kërkojnë të rikthehen në Greqi.

Për sa u përket shqiptarëve rezident në vendet e tjera të Bashkimit Evropian, apo dhe shtetas të tjerë evropian, atyre nuk u lejohet të kalojnë përmes kësaj dogane.

Prej muajit mars kur u pikas i infektuari i parë me COVID-19 në Shqipëri, autoritetet kanë diagnostikuar rreth 6,800 raste, prej së cilave 3,550 janë shëruar, 208 janë mbyllur me vdekje dhe 3,060 mbeten me mbartje të virusit.

Në Greqi situata ka qenë relativisht më e qetë me rreth 6,200 raste të diagnostikuara, prej së cilave 3,800 janë shëruar, 216 janë mbyllur me vdekje dhe rreth 2,200 mbeten me mbartje të virusit.

Në raport me popullsinë Shqipëria (2.8 milionë banorë) ka rreth 2,400 raste për çdo 1 milionë banorë, ndërsa Greqia (10.7 milionë banorë) ka 580 raste.

Lexoni gjithashtu:

Greqia mbyll pjesërisht Kakavijën dhe Kapshticën, vendos rregulla të reja

Greqia rikthen karantinën për shqiptarët, 7 ditë izolim kush kalon nga Kakavija, mbyllet gjatë natës pika kufitare