“Veshët paaftësinë me Kongres”, Boçi debat në Kuvend me Kushin për arsimin

Arsimi është bërë temë debati mes Ministres së Arsimit, Evis Kushi dhe deputetit Luçiano Boçi.

Ky i fundit nga Kuvendi ka hedhur akuza duke thënë se pedagogët janë lënë pas dore nga Ministria dhe qeveria Rama.

Pas akuzave i menjëhershëm ka qenë dhe reagimi i Kushit.

Pjesë nga debati:

“Ua sjell unë të gjithë kolegët tanë që kanë aplikuar për kërkim shkencor. I kemi pothuaj në të gjitha departamentet.  I kemi me shifra. Shoh që nuk jeni dakord me rritjen deri në 15% , e thashë edhe më parë buxheti i shtetit do të mbulojë 7 % ndërsa vetë universitetet mund të rrisin pagat. Nuk janë vetëm tarifat e studentëve burim i të ardhurave. E shikoj se sa ju ka mbetur merak Kongresi i Arsimit dhe sa shumë xheloz jeni bërë për suksesin, ishit të ftuar mund të kishit ardhur.

Ftesa ju erdhi të gjithëve, por nuk e dinim që ju e keni dashur me emër e mbiemër të gjithsecilit. Kongresi ishte një sukses u vlerësua dhe nga ndërkombëtarë, kishte përfaqësues nga universitete më prestigjioze, ju jeni xheloz se mbase nuk keni bërë një kongres si ai. Por të flisni për shkollat  e reja duhet një guxim shumë i madh dhe të flisni për shkollën Sami Frashëri, zor se do të gjeni një infrastrukturë të tillë”, tha ministrja Kushi.

“Besoj se kërkim shkencor ju quani edhe mbylljen e degëve. Keni mbyllur biokiminë, në Korçë, në Gjirokastër. Gjirokastra rrezikon të mbyllet si Universitet, degët e mësuesisë janë shumë të rrezikuara. Edhe në Universitetin e Elbasanit do të mbaheni mend për mbylljen e mësuesisë.  Keni 10 vite që nxirrni se çfarë ka ndodhur para 10 viteve. Këtë vit matematika ka vetëm 20 studentë, a e kuptoni ku po e çoni Shqipërinë. Ju e veshët paaftësinë me Kongres. Bravo, suksese dhe urime”- tha deputeti Boçi.

LEXONI GJITHASHTU: 

• Financimi rus në PD, Spiropali: Auditi qesharak. Berisha: Do hetojmë gjithçka
• Planifikonin vrasjen e “Rrumit të Shijakut”, lihen në burg dy vëllezërit Beqiraj
• “Sa shpejt rrëzohet propaganda”, Tabaku për lirimin e Bllakos: Drejtësia e brishtë!