Ambientalisti: Çmimi i energjisë duhet të ishte rritur në tetor

Ambientalisti, Lavdosh Ferruni thotë se çmimi i energjisë elektrike për familjarët që konsumojnë mbi 800kw në muaj, duhet të kishte hyrë në fuqi në tetor.

Në emisionin “Good Morning Albanians” në Euronews Albania, Ferruni u shpreh se rritja duhet të vazhdojë deri në muajin në prill.

Sipas tij, kjo do të bënte që familjet shqiptare të kursenin energji dhe konsumi i tyre të shkojë nën fashën 800kw.

“Unë në familjen time e kaloj këtë fashë, rreth 100 mijë lekë në muaj. Filluam të gjithë të mendonim se si do kursenim, nëse do kursenim; ne do zbrisnim edhe më poshtë se kjo fashë. Do kishte një efekt induktiv, një shtresë e gjerë e popullsisë do kursenin. Rritja duhet shtrirë jo vetëm për një muaj, por për gjithë dimrin. Duhet të kishte hyrë në fuqi në tetor sipas meje, dhe kjo rritje duhet të vazhdojë deri në prill”, theksoi ai.

Disa ditë më parë, në mbledhjen e ERE u vendos që të hiqet fasha 800 kw për muajin tetor, ku votuan 5 anëtarë.

Çmimi i energjisë elektrike për muajin tetor nuk do të ndryshojë, ndërsa përgjatë këtij muaji do të rishikohet situata dhe do të vendoset nëse çmimi 42kw do të aplikohet gjatë muajit nëntor për të gjithë konsumatorët që kalojnë fashën 800kw.

LEXONI GJITHASHTU

• Çmimi i energjisë, ERE: Hiqet fasha 800 kwh për tetorin
• Siguria dhe energjia/ Samiti i Pragës, në fokus pasojat e luftës në Ukrainë
• 185 milionë euro fatura të papaguara, institucioni që harxhon më shumë energji