Rriten penalitetet për biznesin e madh dhe korporatat

Qeveria nuk propozon ndryshim të taksave për vitin e ardhshëm, por përqendrohet në ashpërsimin e penaliteteve për mospagimin, apo shmangien e tyre.

Drafti i përgatitur nga Ministria e Financave për ndryshimet në ligjin e procedurave penale prekin vetëm nenet që parashikojnë gjobat për individët, të vetëpunësuarit, bizneset e vogla e të mëdha dhe korporatat në rastet e evazionit fiskal.

Ashpërsimet e gjobave janë për bizneset e mëdha, ku kërkohet dyfishimi i saj në rastet kur është fshehur, apo nuk ka deklaruar të plotë pagën e punonjësve. Për të vetëpunësuarit dhe individët gjoba nuk ndryshon.

Ligji përfshin edhe korporatat në pjesën e penaliteteve për mallrat e pashoqëruar me fatura tatimore. Gjoba e përcaktuar në këtë rast është të paktën 750 mijë lekë.

Gjoba për moslëshim faturash është 50 mijë lekë për biznesin e vogël dhe të vetëpunësuarit, 100 mijë lekë për biznesin me xhiro mbi 14 milionë lekë dhe shton gjobën prej 1.5 milionë lekësh për korporatat.

Penaliteti zbutet për individët e detyruar që të dorëzojnë deklaratën e individuale vjetore të të ardhurave. Gjoba për vonesa në deklarimin e saj ulet në 3 mijë lekë, nga 5 mijë që është aktualisht.

Detyrimin për të dorëzuar te tatimet këtë deklaratë e kanë individët që realizojnë të ardhura mbi 2 milionë lekë në vit.

LEXONI GJITHASHTU:

• VIDEO/ Një nga pikturat më të famshme në botë vandalizohet nga dy adoleshente
• NATO nis stërvitjen ushtarake për parandalimin bërthamor, dhjetëra avionë mbi Evropë